ՀՀ ԱԺ  գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահ Արտակ Դավթյանը փետրվարի 28-ին  հանդիպեց Եվրոպական ուսանողական միության ներկայացուցիչների` Լեհաստանի ուսանողական  ազգային միությունների  զարգացման հանձնաժողովի ներկայացուցիչ Մարեկ Բարանսկու, Ռումինիայի ուսանողական ազգային միության նախագահ Դանիելա Ալեքսեի եւ  Ֆինլանդիայի  ուսանողական ասոցիացիայի միջազգային հարաբերությունների հանձնաժողովի նախագահ Յուրի Սալենեի հետ: Հանդիպմանը ներկա էր նաեւ Հայաստանի ուսանողական ազգային ասոցիացիայի  միջազգային հարաբերությունների հանձնաժողովի նախագահ Սարգիս Ասատրյանցը:

 Ինչպես  հյուրերը տեղեկացրին, Հայաստան են այցելել` ուսումնասիրելու Հայաստանի կրթական համակարգը, պարզելու բուհերի կառավարման գործընթացին ուսանողների ներգրավվածության աստիճանը, նրանց խնդիրները,  Եվրոպական ուսանողական միության չափորոշիչներին Հայաստանի կրթական համակարգի համապատասխանութան աստիճանը:

 Եվրոպական ուսանողական միությանը անդամակցում է 35 երկիր, ունի  45 ներկայացուցիչ: Յուրաքանչյուր երկիր Միության կազմում կարող է ունենալ 2 անդամ: Կառույցին անդամակցում են նաեւ Վրաստանը եւ Ադրբեջանը:

  Հյուրերն  իրազեկեցին, որ դեռեւս 2008  թվականին Հայաստանի ուսանողական ազգային ասոցիացիան անդամակցության խնդրանքով դիմել է Եվրոպական ուսանողական միությանը, ինչը, սակայն, մերժվել է, քանի որ, ըստ իրականացված ուսումնասիրությունների`առկա են եղել որոշակի խնդիրներ:

Ողջունելով հյուրերի այցը Հայաստան` Արտակ Դավթյանը նշեց, որ իր ղեկավարած հանձնաժողովը զբաղվում է  նաեւ երիտասարդությանը եւ կրթությանը վերաբերող հարցերով:

Պարոն Դավթյանը նշեց, որ կրթության ոլորտում իրականացվել են մի շարք օրենսդրական բարեփոխումներ. բարձրագույն կրթության բնագավառում կատարված փոփոխությունների առանցքում Բոլոնյան գործընթացն է, որը ենթադրում է ուսանողների եւ դասախոսների ազատ տեղաշարժ:  Բացի այդ`գործնականում ներդրվել է կրեդիտային համակարգը, իսկ բուհերի կառավարման խորհուրդների 25 տոկոսը ուսանողներ են, ովքեր  մասնակցում են կարեւոր հարցերի քննարկմանը:

Պարոն Դավթյանը հյուրերին տեղեկացրեց, որ հանձնաժողովին կից գործում է Երիտասարդական խորհրդարան:

Հանձնաժողովի նախագահը պատրաստակամություն հայտնեց հնարավորինս աջակցելու Հայաստանի ուսանողական ազգային ասոցիացիային` անդամակցելու Եվրոպական ուսանողական միությանը:

ԱԺ հասարակայնության եւ տեղեկատվության միջոցների հետ կապերի վարչություն